港聞

港聞二

下一篇
上一篇

「突破界限」 陳凱欣誤帶家人入禁區影相

【明報專訊】立法會議員陳凱欣噚日履新,佢選舉期間以「突破界限」為口號,結果一上任就突破咗立法會指引。話說阿欣老公邱文華同父母特意到場見證佢宣誓一刻,其後一家人喺會議廳前廳外合照,一眾攝記唔放過呢個機會大影特影。

不過,根據立法會指引,會議舉行期間,議員訪客除咗到訪公眾席或觀景廊之外,唔能夠進入會議場地所在樓層,立法會職員隨即請佢哋離開,佢哋唯有移師到會議廳議員入口外影相。做過記者嘅阿欣仲同傳媒講,因為想遵守規則,希望大家可以將今次件事「抹咗佢」。

阿欣助手就話,因為陳啱啱履新,立法會未畀指引佢哋。Emily嘅攝記同事就話,當時係由助手通知佢哋,阿欣家人會落嚟,所以佢哋排好陣做準備,仲話阿欣拉媽咪嚟影相。

雖然被請離場,但呢段小插曲都不減溫韾,阿欣影相時一直攬實媽媽,期間佢有兩聲咳,爸爸即刻輕拍佢膊頭。阿欣其後透過助理回覆,事件係同保安人員溝通誤會所致。

相關字詞﹕emily 陳凱欣 立法會

上 / 下一篇新聞