港聞

港聞二

下一篇
上一篇

集各地18件光影展品 燈影節LED頭顱發光白馬 最啱打卡

【明報專訊】香港旅遊發展局今年搞搞新意思,辦咗個香港最大型戶外光影節,由今日到下年2月24日,喺添馬公園至中環碼頭,放咗18件來自世界各地同本哋製作嘅光影展品,除咗有鋼架搭成嘅25米高聖誕樹,喺中環摩天輪旁邊,每20分鐘就有場燈光同音效匯演,亦有4000粒LED燈泡製成嘅「頭顱」,呢個巨頭會聽聲同做唔同表情。成年人可以去踩單車玩Lightbattle,小朋友就可以騎發光白馬,現場仲有部「Light Piano」,大家一邊彈,周圍嘅燈會跟住變色,總之啱晒大家打卡、影相呃like。

耗2300萬 旅發局料吸50萬人次

旅發局總幹事劉鎮漢話,今次活動用咗2300萬元,好有信心會受歡迎,估計可以吸引50萬人次,所以互動展品每人限玩3分鐘,騎白馬就只限小朋友,兼限時1分鐘;亮燈時間由下晝5點至晚上11點,不過平安夜同除夕呢啲特別日子或者會延長時間,到1月時會換吓部分展品,迎合2月情人節氣氛。

呢個「閃躍維港燈影節」仲包括加強版「幻彩詠香江」,喺3幢大廈:海港中心、夏慤大廈及長江中心嘅樓頂於指定日子放煙火,連帶皇后像廣場聖誕樹亦將會換上全新「冰感」感覺。

上 / 下一篇新聞