港聞

港聞二

下一篇
上一篇

民記籌款宴 前局長大跳K-pop 張曉明郵冊題字籌220萬

【明報專訊】民建聯兩年一度嘅籌款晚會噚晚喺灣仔會展舉行,主題係「全賴有您」,主席李慧琼致辭時話,有朋友同佢講笑,話「1125同1126都係投票日,1125係投票,1126係投鈔票」。佢話兩年前已定今次晚宴日期,同補選接住係「完美巧合」,形容陳凱欣當選係因為大家。噚晚現場粗略統計,單計拍賣,未計賣枱費,料民記籌到約6000萬元。

饒宗頤墨寶籌千萬

晚會高潮之一係3個前局長高永文、譚志源同蘇錦樑盛裝大跳K-pop,光頭嘅譚志源戴埋假髮上陣,佢哋跳得有板有眼,跳得起勁之際仲將外套扔落台。嘉賓睇得高興,前特首梁振英舉起手機影相,特首林鄭月娥睇到拍晒手掌。蘇錦樑同Emily講,事前只夾咗3、4次。民建聯前主席曾鈺成同譚耀宗就表演棟篤笑,籌得610萬。

兩年前民記一晚籌得7600萬,當時單係時任中聯辦主任張曉明捐贈寫上「度德而處」嘅書法,已為該黨籌得1880萬。今年中聯辦主任王志民無寫字畀民記籌款,噚晚亦無出席晚會;而張曉明就好念舊,其中一樣拍賣品係「不忘初心 牢記使命」郵票珍藏冊,上面有張題字,寫上「中國夢裡有香港同胞的事業夢、家庭夢、幸福夢」,底價50萬元,最後以220萬成交。

兩年前張曉明題字,籌款額遠高於國學大師饒宗頤墨寶嘅300萬;噚晚都有饒老嘅墨寶「量寬福厚」拍賣,繼續由全國政協常委許榮茂出手,今次成交價就達1000萬元。

相關字詞﹕許榮茂 度德而處 張曉明 譚志源 民建聯籌款

上 / 下一篇新聞