港聞

港聞二

下一篇
上一篇

梁美芬:戀愛真係唔一定要結婚

【明報專訊】立法會周四辯論由人民力量陳志全(慢必)提出「研究制訂讓同志締結伴侶關係的政策」嘅議員議案,反對同性婚姻嘅經民聯梁美芬提出修正案,兩者都被否決。兩人噚日再喺港台節目唇槍舌劍,其間梁美芬話:「人戀愛真的不一定要結婚,你有各種不同戀愛嘅方式……有啲人一夫多妻,或者婚外情甚至包二奶,仲有同志朋友相愛,其實呢啲係超出咗婚姻制度內嘅愛情關係或戀愛關係,你可以用另外嘅形式。」

慢必重申,佢提出嘅議案唔係要打倒一夫一妻制,及令「一夫一夫」和「一妻一妻」成為主流,而係考慮喺一夫一妻制度下,容許其他形式嘅締結伴侶關係。佢認為政府應該要處理同志伴侶嘅實際需要,但實際上要有改變或要依靠司法覆核。

梁美芬就話,一啲涉及社會重大價值嘅事,唔應該由「有啲唔熟悉香港自己文化、民情嘅(人),去決定咁大嘅婚姻制度」。佢又話自己曾建議就「受養人」定義修例,畀長期互相依賴生活嘅伴侶提供證明,納入受養人定義。慢必反駁,申請公屋同合併報稅等,係無法以擴闊關係定義處理。

上 / 下一篇新聞