港聞

港聞二

下一篇
上一篇

張國鈞帶幼園遊立會 「巧遇」囡囡

【明報專訊】唔少學校同機構都會組團參觀立法會,帶佢哋參觀並講解吓議會運作,立法會議員安排到時間亦會參與,做吓導遊。民建聯立法會議員張國鈞(Horace)噚日負責帶團時,參觀者之一係佢讀緊幼稚園K3班嘅細女,Horace話本身知道囡囡參觀立法會,咁啱會議噚日下晝1點已經結束,佢就帶團喺地下大堂影相,同埋上會議廳參觀,介紹議會運作。當時有老師同成班同學仔講,張議員係其中一個同學嘅爸爸,叫同學仔估吓,但開估後大家都覺得兩人唔算太似樣,要Horace除眼鏡企埋一齊比對吓。

Horace話細女一向好黐佢,佢平日返屋企都比較夜,大家見面時間唔多,所以囡囡見到爸爸都好開心。佢又話囡囡對立法會好有印象,因為兩年前嘅萬聖節,佢帶兩個女入立法會問議員拎糖食,所以對囡囡嚟講,立法會係一個好開心嘅地方,可以扮鬼扮馬又有糖食。

相關字詞﹕張國鈞 民建聯 幼稚園 立法會

上 / 下一篇新聞