港聞

港聞二

下一篇
上一篇

田北俊談明日大嶼:以為愚蠢個愚

【明報專訊】自由黨榮譽主席田北俊出名敢言,佢噚日接受民主黨前主席劉慧卿主持嘅網台節目《議會內外》訪問時,就質疑特首林鄭月娥喺土地供應專責小組未交報告前,已搶先公布「明日大嶼」計劃嘅做法,「明日大嶼,我初初聽到,(以為)係咪愚蠢個『愚』?」

事緣田大少節目上講到應該就《基本法》23條立法做諮詢,卿姐就慨嘆林鄭月娥搵土地供應小組主席黃遠輝等人搞「土地大辯論」,但未完就走出嚟話支持填海,「盞搞啦」。田大少話覺得林太絕對受到教訓,認為唔可以未完諮詢就走出嚟拍板,「明日大嶼,我初初聽到,係咪愚蠢個愚?」

卿姐節目上講起往事,2003年有自由黨中人同佢講,7.1當晚去啲高級餐廳食飯,點知入面成間餐廳啲人都係著黑衫,相信係遊行完去食飯,所以卿姐認為就算係有錢人、專業人士都驚無自由。佢又指田大少曾反對23條立法,問到如果由佢擔任「黃遠輝3.0」、「周永新4.0」嘅角色,帶領23條諮詢又得唔得呢?田大少就話佢都退咗休,「退咗休唔會做辛苦嘢……我哋𠵱家做吓評論員好啦」。

相關字詞﹕填海 土地供應專責小組 土地大辯論 明日大嶼 林鄭月娥

上 / 下一篇新聞