港聞

港聞二

下一篇
上一篇

街坊認錯曾偉雄做馮檢基 黃之鋒:髮型有啲似

【明報專訊】立法會九龍西補選後日(25日)舉行,香港眾志黃之鋒噚日喺黃埔為工黨李卓人拉票,恰巧「撞正」警務處前處長曾偉雄為建制派代表陳凱欣拉票。曾偉雄及另一候選人馮檢基嘅髮型,同樣係頭頂光滑、兩側留髮,黃之鋒喺facebook發帖,話拉票時有街坊認唔出曾偉雄,問之鋒「嗰個係咪馮檢基」,之鋒都話原因可能係兩人「髮型有啲似」。

從之鋒上載嘅照片可見,曾偉雄企喺佢旁邊,一時拎住陳凱欣傳單,一時拎住代表陳凱欣候選號碼嘅「5」字牌。之鋒話,自己「當年被佢拉咗咁多次,終於見到佢真人」,形容曾偉雄似乎唔係好慣拉票,「啲面部表情都有啲生硬」。

陳凱欣噚日除咗獲得曾偉雄撐場,亦獲得前局長陳家強及黎棟國落區拉票,陳凱欣形容好多好友知道佢選情嚴峻,都即刻挺身支持。李卓人方面,則獲泛民人士拉票,好似公民黨郭榮鏗噚晚去咗美孚,民主黨兩名前主席劉慧卿同何俊仁,噚日亦喺紅磡和土瓜灣為李卓人叫咪宣傳。

馮檢基噚日就召開記者會,反駁有傳媒日前做嘅選舉民調,批評報道抹黑佢,阿基指外界唔應該形容佢係「𠝹票」,強調自己「唔係𠝹票基,係吸票基」,話自己如果可以攞晒尚未決定投票取向選民嘅票,就會係最高票嗰個候選人;佢之後去廉政公署投訴有關報道。九龍西補選其他候選人包括伍廸希和曾麗文。

相關字詞﹕九龍西補選 曾偉雄 李卓人 陳凱欣 馮檢基

上 / 下一篇新聞