港聞

港聞二

上一篇

大肚容海恩打流感針 盧偉國呷醋

【明報專訊】冬季流感季節即將來臨,為咗推廣接種流感疫苗嘅信息,衛生署噚日派護士到立法會為議員打流感針,約30名議員輪流接種。正懷孕嘅新民黨容海恩(Eunice)打針時成為焦點,食物及衛生局長陳肇始輕搭佢膊頭,醫學界議員陳沛然在旁打氣;與Eunice同一時間打針嘅經民聯盧偉國就扮「呷醋」,講笑話傳媒個個都影Eunice打針唔影佢,畀Eunice搶晒鏡。

到場支持嘅陳肇始話每年1月至3月都係流感高峰期,呼籲無論高危定健康嘅人都要及早接種流感針,因為打針係預防流感嘅最好方法;並透露衛生署至今已打咗超過59萬劑流感針,比去年同期升五成,反映市民意識提高。陳肇始同議員言談甚歡,更半講笑建議議員應該登記埋器官捐贈。

多名高官噚日亦喺政府總部打流感針,包括勞福局長羅致光、發展局長黃偉綸、教育局長楊潤雄、政制及內地事務局長聶德權,以及多名副局長。

相關字詞﹕容海恩 流感疫苗

上 / 下一篇新聞