港聞

港聞二

下一篇
上一篇

譚文豪赴英唱好香港 建制缺席 寄語多接觸外國 勿「滿腦大灣區」

【明報專訊】美國國會轄下「美中經濟與安全審查委員會」年度報告批評北京持續侵蝕香港自由,有建制派歸咎民主派議員經常去外國「唱衰香港」。公民黨譚文豪(Jeremy,圖)噚日預告,下星期會代表立法會去英國倫敦出席議會研討會,以往慣例係民主派同建制派各有一名代表出席,但今年建制派無人報名,Jeremy批評建制派「鴕鳥政策」,寄語佢哋應該多同外國接觸,解釋香港情况。

呢個研討會雲集世界各地議會代表,Jeremy話,自己會講述一國兩制面對嘅挑戰,同時亦會唱好香港,向佢哋解釋香港係值得獨立關稅區嘅身分,並非只係另一個內地城市。佢話建制派唔應該收埋自己喺香港,就覺得香港好好,亦唔應該「滿腦子大灣區」,要多啲同外國接觸。

公民黨主席梁家傑前排到訪歐洲議會,傑哥亦強調佢唔係唱衰香港,而係表達一國兩制「殘而未廢,仍有希望」。

工聯會黃國健同Emily講,建制派以至工聯會都無討論過係咪派人出席研討會,參加與否純屬個人興趣。

黃國健:毋須特別唱好

對於建制派今次係咪放棄去外國「唱好香港」嘅機會,黃國健就形容香港已經好好,毋須特別唱好,又話外國政府都有唔少人喺香港,大家可以隨時碰頭咁話。

相關字詞﹕美中經濟與安全審查委員會 公民黨 譚文豪

上 / 下一篇新聞