港聞

港聞二

下一篇
上一篇

蘇偉文化身茶客 推銷三隧分流

【明報專訊】政府喺《施政報告》提出三隧分流方案,建議私家車、的士、電單車使用紅隧同東隧加價,使用西隧減價,從而分流車輛,紓緩擠塞。但方案遭到社會極大爭議。運輸及房屋局噚日就喺facebook專頁宣傳方案,拍左段《廿二樓East座》嘅片,副局長蘇偉文「粉墨登場」,化身茶餐廳茶客向市民解釋方案,話可縮短繁忙時間紅隧同東隧嘅總車龍一成至四成,令過海時間最多縮短13分鐘,仲話每年慳番嘅時間同油錢相等於8億元,所減少嘅車輛廢氣排放相當於種植16萬棵樹,可以改善香港空氣質素。

片段入面有市民問可唔可以紅隧同東隧加價加少啲,蘇偉文話收費方案係經過科學分析,如果紅隧同東隧加少啲,就會無咁多車轉用西隧,反而東隧條車龍會長咗,令到路面嘅整體需求大咗,仲會塞埋非過海交通。

網民對宣傳片就負評居多,截至噚晚10點270個反應中,有超過130個係網民「派嬲」,有網民批評政府「諗得太過天真」,又話「你估啲人貪過癮好得閒咩」。睇嚟政府要說服公眾仲要落多啲工夫。

上 / 下一篇新聞