港聞

港聞二

下一篇
上一篇

立會延長產假 容海恩無份

【明報專訊】立法會喜事多籮籮,除咗新民黨議員容海恩(Eunice)出年會生BB之外,立法會秘書處現時亦有3名職員喺1月後分娩。立法會行政管理委員會噚日開會,之後身兼行管會主席嘅立法會主席梁君彥話,委員一致決定即時將產假由10周延長至14周,睇齊政府做法,相信準備做媽媽嘅立法會職員都會相當高興。不過由於立法會議員係公職,無放產假嘅安排,所以Eunice就唔適用。

秘書處多人有喜

梁君彥話,產假新安排嘅資源影響會由行管會積蓄支付,數目唔大,行管會可以應付;又話如果延長產假條例通過,相關金額會由政府支付。之前有議員要求增加立法會育嬰設施,梁君彥就話大樓地下有育嬰室,畀公眾使用,但使用率低,𠵱家睇唔到有增加需要;佢知道有議員快分娩,行管會副主席同佢溝通,檢視立會可做得更好嘅地方。Eunice曾提懷孕可能令佢缺席議會,希望立法會畀佢遙距投票,又或授權黨友幫手投票,梁君彥話呢個問題敏感,亦與《基本法》有關,會交由議事規則委員會檢視。

相關字詞﹕產假 立法會

上 / 下一篇新聞