港聞

港聞二

下一篇
上一篇

《警校七十》話當年 阿sir赤膊等閒事

【明報專訊】前身名為「警察訓練學校」嘅警察基礎訓練學校成立咗70年,警隊近日出咗本《警校七十》刊物,講吓警校歷史,仲有唔少珍貴舊相。Emily見到黑白相中,由學警步操、警察樂隊人員練習吹奏樂曲,以至喺警官會所飲杯茶休息時,大家當年都會赤膊上陣,而隨着女警數目日增,呢類情景已不復見。

特刊都有講起香港首間警校於1869年10月成立,初期係夜校,借用不同地方上堂,如現為「大館」嘅中央警署內警察圖書館,以至皇仁書院,至1920年先喺中區警署內設警察學校,1946年又曾搬去赤柱聖士提反小學內,於1948年先遷入現時黃竹坑嘅永久校舍。

特刊訪問警校內不同單位工作人員,其中提到警官餐廳嘅轉變,問咗負責酒保工作嘅溫志明「明哥」,佢回想起身為輔警榮譽總監嘅雅麗珊郡主訪港時到訪警校,有去酒吧歇息,事前有政府禮賓府人員專門教明哥接待王室嘅禮儀。

相關字詞﹕警察樂隊 雅麗珊郡主 大館 警校

上 / 下一篇新聞