港聞

港聞二

下一篇
上一篇

被問同王維基幾時行禮 袁莎妮:好日嚟嘅

【明報專訊】香港電視主席王維基上個月入紙,同香港總商會總裁袁莎妮(Shirley,圖)登記結婚,Shirley噚日出席總商會記者會後被問到婚訊時忍唔住甜笑,「畀啲私人空間我哋啦」,又話已經當件事係完成咗,但亦話入咗紙就要經過程序,咁即係幾時行禮呀?佢未有正面回應,只肯透露係「好日嚟嘅」。

總商會再請搭電車

Shirley噚日喺記者會上,主力介紹香港總商會創會157周年活動「全程為您」,喺本月29日請市民免費乘搭往來堅尼地城至筲箕灣全線電車,以及兩條分別來往尖沙嘴至中環同灣仔嘅天星小輪航線。

Shirley話,活動由2011年開始舉辦,每年惠及超過30萬人次,預算總開支逾200萬元,會揀天星小輪同電車,係因為兩種交通工具都同總商會一樣,有過百年歷史,見證香港風雨,所以希望遊客同市民都有機會免費乘搭,帶啲正能量畀社會。

Shirley亦特別介紹總商會「全港十八區詩人」活動,只要like咗佢哋個facebook page,寫首詩tag吓朋友仔,就可以參加抽獎,獎品包括酒店住宿同自助餐。

相關字詞﹕香港總商會 袁莎妮 王維基 結婚

上 / 下一篇新聞