港聞

港聞二

下一篇
上一篇

汪阿姐紅字tag人 政界都跟風

【明報專訊】藝人汪明荃嘅instagram近日備受關注,事緣汪阿姐嘅tag人方式相當特別,直接喺張相度用紅字手寫上合照者個名,引起網民熱議。唔少政界中人即刻喺facebook抽水搞笑,政制及內地事務局長聶德權分別post咗自己前幾日出席神託會活動,以及8年前做社署署長時同朋友Alan嘅合照,力證大家相識多年,仲用紅筆分別寫「Alan」、「我」嘅字樣。

網民笑似淋油追債

實政圓桌議員田北辰亦上載喺海關關員工會聯歡晚會上,同一眾社區幹事莊豪鋒、潘俊恩、劉啟文嘅合照,田二少仲非常細心,寫埋每個人分別係元朗、東涌同屯門幹事。就連水務署吉祥物「滴惜仔」都唔執輸,但就只係上載獨照,用紅字寫上「惜水KOL」字樣,乘機宣傳吓叫大家珍惜用水。

雖然網民紛紛笑汪阿姐嘅tag人方式好似淋紅油追債咁款,但阿姐噚日繼續咁玩,甚至再進一步,喺相中用紅字寫上「忘我」、「興奮」、「靚」等字去形容啲相,更hashtag話「我就是ig紅人」𠻹。睇嚟未來一段時間各界都會繼續跟汪阿姐方式tag人,唔知呢股風潮可以玩幾耐呢?

相關字詞﹕汪明荃 聶德權 田北辰

上 / 下一篇新聞