港聞

港聞二

下一篇
上一篇

凱欣阿人 你急我都急

【明報專訊】下周日就係九龍西補選投票日,候選人亦開始打選舉後期常見嘅「告急牌」。噚晚港台播出選舉論壇,獲建制派支持嘅陳凱欣形容選情「十分嚴峻」,呼籲九西選民全家總動員支持;工黨李卓人亦告急,形容自己畀其他候選人圍攻,香港亦正畀特首林鄭月娥、保皇黨等圍攻,呼籲大家支持佢。

錯話阿人無入房屋委會 陳拒澄清

選舉論壇最精彩通常都係互通質詢環節,由於近日多個傳媒都搞論壇,早前論壇嘅恩怨亦延續到噚晚嘅港台論壇。李卓人批評陳凱欣早前就屈佢做議員咁多年都無加入房屋事務委員會,佢要求陳道歉及澄清;陳凱欣未理會,只係話對方做議員多年,咁多房屋問題都解決唔到,點解選民仲要選佢。李卓人反駁,過去提出改善基層嘅動議係被保皇黨反對。候選人伍廸希加入戰團,質疑陳凱欣做過採訪主任,但資料蒐集比較差,話李卓人早前已澄清曾加入房屋事務委員會,質疑陳點解仲再講錯;又批評李卓人早年曾缺席有關租金管制嘅投票。

李卓人要求陳凱欣就係咪贊成標準工時立法表態,陳無答並批評對方多年來經常誤判、嚴人寬己等,質疑對方咁多年都無為民生做過乜。李卓人批評陳凱欣不斷抹黑,但就迴避所有政治問題。

辯論中段候選人曾麗文一直無出聲,主持問佢要唔要提問,佢就回應話無興趣參與低質素辯論。而馮檢基則喺論壇繼續攻擊泛民「威權霸權反民主」。

上 / 下一篇新聞