【明報專訊】喺中環經營Levels同Bungalow等酒吧會所嘅「香港娛樂集團」申請主板上市，前日交咗初步上市文件，唔單止有藝人王秀琳（Mango）做公司股東，仲有政界中人做「獨董」，嗰個就係資深大律師、民主思路召集人湯家驊（Ronny）啦。
不過，Ronny身兼行政會議成員，根據行會成員個人利益登記冊，擔任「私營公司受薪董事」要申報，但Emily見Ronny喺今年7月嘅登記冊資料上，無關於佢做獨立非執行董事嘅資料。Emily噚日問起Ronny，佢就話噚日仲未被正式委任做「香港娛樂」獨董，要等公司成功上市先，仲叫Emily放心，話到時一定會向行會申報利益。
其實除咗現任行會成員，呢隻夜場股都有揾嚟前警官做獨立執董，包括前助理警務處長孟義勤（Peter Morgan），孟義勤曾為警隊談判組主管，4年前退休。
