港聞

港聞二

下一篇
上一篇

三膠人哥遭卿姐獻「必勝吻」

【明報專訊】九西補選25號周日舉行,候選人之一、自言集「三膠於一身」嘅工黨李卓人噚晚喺油麻地舉行造勢大會,其間民主黨前主席劉慧卿喺fb上載親吻人哥面頰嘅相,呼籲網民支持人哥,相中人哥「紅都面晒」,笑得相當開心。卿姐嘅吻一直被稱為「勝利之吻」,惜過嘅公民黨楊岳橋、民主黨林卓廷、鄺俊宇等都先後當選,唔知今次會唔會再下一城呢?

造勢大會 明哥唱《奮鬥》

人哥發言時就話唔少人認為佢係「大中華膠」、「老泛民」同「左膠」,「我李卓人集三膠於一身」,但唔希望標籤令人同人之間有隔膜,因為每個人都係雞蛋,要共同撼低高牆,佢話自己其實係「團結膠」,一定會同大家團結打落去。

歌手黃耀明亦有出席,上台唱咗《今天應該很高興》、《奮鬥》兩首歌,又暗諷另一候選人馮檢基,話有啲人被指係同志時會反駁,話畀人「人格謀殺」,相信人哥唔會咁。

范太胡定旭陪陳凱欣拉票

另一候選人、食物及衛生局前政治助理陳凱欣上載照片,顯示佢先後由前全國人大常委范徐麗泰、醫管局前主席胡定旭陪同落區拉票,又上載警務處前處長鄧竟成嘅短片,鄧竟成讚陳凱欣充滿正能量、辦事積極、有分析頭腦。

九西補選其他參選人包括伍廸希、曾麗文。

上 / 下一篇新聞