港聞

港聞二

下一篇
上一篇

一車掛三車牌 「港澳牌」罕見

【明報專訊】南區區議員司馬文噚日喺佢facebook放咗一張相,相中有架車掛住3個唔同嘅車牌,司馬文仲話係「香港新身分象徵」。Emily睇張相嘅背景似係東涌,唔知係咪喺港珠澳大橋附近呢?司馬文話張相係佢上月有朋友於社交軟件群組分享,要問番先知喺邊度影。

再望吓張相,Emily認得其中兩個車牌分別係中港牌同香港車牌,但第3個真係少見,就打畀熟悉中港澳3地車牌嘅「港澳一號」董事鍾偉棠問吓。鍾偉棠話,相中第3個車牌,即係最底嗰個,係港澳車牌,如果架車要喺澳門同香港市內行駛就一定要有。佢仲話,如果要經港珠澳大橋並喺3地市內通行,就一定要好似相入面架車咁掛足3個牌,因為一國三地有唔同嘅行政守則。

咁係咪以後有機會周街都見到一車三牌?鍾偉棠就話唔會,因為據佢所知港澳牌香港只有300個,而澳門暫時都冇再考慮增加港澳牌數量,唔係咁容易拎到㗎。運輸署就話,香港無限定每架車所掛車牌嘅數量,《道路交通(車輛登記及領牌)規例》只要求展示喺車尾嘅車牌在車後看,須易於識別。

上 / 下一篇新聞