港聞

港聞二

下一篇
上一篇

小麗美孚集合被罵 批陳凱欣義工

【明報專訊】早前喺選舉論壇上攻擊對手李卓人團隊滋擾嘅九龍西補選候選人陳凱欣,佢同其團隊噚日落區時又同李卓人團隊起衝突。為阿人助選嘅立法會前議員劉小麗喺facebook話,其跑步助選團噚日諗住由美孚跑到深水埗,點知朝早7點半喺美孚集合時,突然有一名自稱法團成員嘅女子及兩個屋苑保安要求佢哋離開屋苑範圍,話該範圍禁止出現政治宣傳,即使佢哋只係企喺度集合都被指罵。

不過,該名自稱法團成員嘅女子,轉頭就走去為陳凱欣嘅街站助選、派單張。小麗批評該女子係「假法團、真保皇」,又公開對方張相話「無恥之徒,莫過於此」。有陳凱欣選舉團隊成員承認,該女子的確係佢哋嘅義工,但因為暫時未能聯絡,所以無法確認係咪法團成員。

其後陳凱欣亦喺fb出post,上載劉小麗拎住手機拍攝嘅照片,疑似隔空回應。陳凱欣話,即使再次面對無禮、惡意及肆意挑釁嘅對待,都唔能夠打擊成個團隊嘅決心,反而更加堅定佢哋嘅信念,「我只想努力建設,不想再見到肆意破壞」。

上 / 下一篇新聞