港聞

港聞二

下一篇
上一篇

指無時間準備 即問即答更真實 林鄭踢爆商界提問預先通水

【明報專訊】特首林鄭月娥噚日嘅行程排到密麻麻,單係中午前後已經要走3場,包括立法會行政長官質詢、商界聯席午餐會、香港銀行公會午餐會,時間緊迫,但特首仍然展現其「好打得」嘅本色。話說商界聯席午餐會去到答問部分尾聲,林太突然提出建議,明年嘅午餐會唔使預先畀佢知道提問內容,反正佢都無時間準備答案,又話即場提問令佢可以更真實回應咁話。林太咁講可能係出於善意,亦反映佢有信心應付任何提問,但係就踢爆咗主辦單位原來事先向出席嘉賓通水嘅。

商界問點說服市民撐填海

雖然去到商界「主場」,林太演辭對商界都唔係咁客氣,講到勞福問題,佢話知道商界對《施政報告》嘅勞工政策有不滿,但都希望商界設身處地為打工仔設想,又話政府都作出好大承擔,例如幾乎全數承擔增加額外4周產假嘅薪酬開支,希望有關政策唔會被業界投訴。

到答問環節,有商界代表表態支持「明日大嶼」願景,不過就關注政府點樣說服市民支持計劃。林太承認現時嘅香港,任何事要達到一致共識係無可能,但不能以此作為唔做嘢嘅藉口,政府亦已預見社會有反對聲音,會繼續向公眾解釋填海嘅需要。

相關字詞﹕明日大嶼願景 施政報告

上 / 下一篇新聞