娛樂

黎明演唱會驚喜曬舞功 鄭秀文:郭富城見到都怯一怯

【明報專訊】黎明前晚第2場紅館演唱會請來鄭秀文擔任嘉賓,天王天后同台合唱後者的歌曲《信者得愛》,黎明罕有大曬舞功,又跳又rap歌,帶給鄭秀文及觀眾驚喜。鄭秀文看到黎明的舞姿忍不住狂笑,笑言黎明跳得狂野,「舞台王者」郭富城見到都怯一怯。鄭秀文爆黎明個人「好飄、好迷離」,當年主動要幫她拍MV,但突然說沒空不拍。黎明跟鄭秀文分享自創的「風呂減肥法」,鄭秀文聽到黎明說除衫浸時「嘩」一聲,說好有畫面。

娛樂組

黎明第2場演唱會獲契爺胡楓、霍啟剛與太太郭晶晶、林嘉欣與丈夫袁劍偉、蔡一傑等捧場。

黎明自創風呂減肥法

擔任嘉賓的鄭秀文一身型爆打扮亮相,她熱愛運動,經常在社交網分享跑步及健身後的爆汗片段,黎明立即跟她分享「出汗」心得。黎明問鄭秀文知否他如何喼弗?鄭秀文初時笑着反問:「你有喼過弗咩?係喎,弗咗喎!」黎明自言採用日本風呂式,除衫浸浴,幻想自己身在日本,聽着音樂浸20分鐘,之後起身著浴袍,空調開28度,食碗辣麵,坐15分鐘,就會成身流汗,肯定減3至4磅。鄭秀文聞言說:「嘩,又浴缸又除衫,好有畫面喎。每個程序都咁熱辣辣,包你流埋鼻血呀。見到你啲肥肉呀!𠵱家冇,𠵱家好弗!」黎明說:「肥肉會慢慢變少,水分嚟啫!」

黎明再向鄭秀文請教節食減肥心得:「有人減肥每日只食一粒豆,你有冇試過?」鄭秀文說:「一粒豆?減肥?這個不是減肥法,是減壽法喎!一日一粒豆真係唔掂,起碼食兩粒,早晚各一粒,飽啲!」全場爆笑。鄭秀文續說:「好多人以為我不斷減肥,其實我現在做的功課不是減肥是喼弗,做運動和食得健康,最緊要健康,肥瘦都不緊要。今(前)日來到呢個舞台見到你,依然咁靚仔。」

鄭秀文爆黎明「好飄、好迷離」

鄭秀文接着爆料指黎明不知由幾時開始個人「好飄、好迷離」。她指黎明幾年前打電話給她,話想幫她監製一首歌,她想:「乜你識監製歌咩?心裏滿是疑問,不過見係黎明就好啦;然後你搵我哋老友雷頌德幫我寫首歌《犀利》,你仲話要幫我拍MV,點知有一日,你又話唔得閒,唔幫我拍MV。嘩,乜你咁飄㗎?你的節奏好難跟呀。」黎明坦言:「我知我成日講嘢斷片,生活都係咁。」鄭秀文取笑他:「啲人話生咗仔會無記性。」黎明反駁:「又唔係我去生。」鄭秀文隨即稱生女可能較好,育有一女的黎明即笑說:「可能是。」之後他們合唱《信者得愛》,黎明不但戴上太陽眼鏡伴舞,更rap歌,給鄭秀文和觀眾驚喜,全場歡呼尖叫。

鄭秀文事後在社交網笑言成功打開了黎明的腿,跳舞好狂野,她開玩笑說:「城城(郭富城)見到應該會雙腿發軟怯一怯。」今次做嘉賓,激發起鄭秀文的演唱會癮,說要快快想演唱會的事。

■更多娛樂猛料 ﹕ol.mingpao.com

相關字詞﹕「舞台王者」郭富城 鄭秀文 信者得愛 黎明

上 / 下一篇新聞