主題樂園喺復活節假期人山人海，其中香港迪士尼樂園預約接近爆滿。上任約4個月嘅香港迪士尼樂園度假區行政總裁莫偉庭（Michael）趁假期落場幫手，換制服化身「酒店行李款待專員」，仲用廣東話同賓客、同事溝通，同事讚佢夠貼地啊。
早喺復活節前，Michael已受訓，了解各部門工作，之後就去樂園酒店，負責喺門外指揮交通、迎接賓客、幫賓客影相，同埋協助賓客送行李上房等。
指導Michael嘅酒店前堂賓客服務經理黃柏霖覺得Michael好主動積極，仲非常貼地，迎接賓客時會用廣東話講「有咩幫到你？」、遇到問題要問同事都會講「唔好意思，阻阻你」、「唔該晒」。行李部組長李諾夫就話，Micheal同佢講「你哋每日搬咁多行李，真係辛苦你哋喇」，令佢好窩心。