港聞

下一篇
上一篇

【Emily Online】任何仁衝出國際BBC都報道 引網民:消防形象夠好可做瘋狂事 (21:22)

消防處用嚟宣傳急救信息、全身藍色只著一條短褲嘅「任何仁」(Anyone),衝出國際喇!英國廣播公司(BBC)喺當地時間星期四(8日)除咗報道,任何仁成功吸引網民瘋傳之外,連香港電台早兩日引述消防內部消息話任何仁可能被「雪藏」,之後網民努力幫佢「求情」嘅情況都講埋。BBC仲引用網民嘅評論話,消防處形象「好到可以做呢啲瘋狂事(good enough to do these sort of crazy things)」呀。

雖然任何仁已經喺消防處facebook表明,自己唔係處方吉祥物,但BBC依然形容,佢係「由頭到腳被藍色萊卡纖維布包住」(clad in blue lycra from head-to-toe)嘅「吉祥物」,話佢星期一(5日)喺消防處記者會現真身時,令會場內嘅傳媒好驚訝。

不過BBC都唔係只報道任何仁嘅「花邊新聞」,都有話畀讀者知,佢其實係消防處用嚟提高公眾對安全嘅關注。報道仲提到佢同羅蘭姐一齊拍、教市民點樣「左手,右手,直手擺喺心口」,嚟幫有需要嘅人做CPR嗰個《擊活人心》MV,已經有成50萬人睇過。

(BBC)

相關報道:【Emily Online.短片】「任何仁」伙曹星如再出片 結尾一句「最後一集」現真身 網民又擔心被消失

其他報道:【東涌迫爆.短片】陳帆籲乘B5往欣澳轉港鐵出市區 「轉乘地鐵有$1優惠」

相關字詞﹕任何仁 anyone 英國廣播公司 消防處 急救 編輯推介

上 / 下一篇新聞