港聞

下一篇
上一篇

【Emily Online】「任何仁」上水報平安 網民盼勿消失:港人愛你 (17:06)

負責為消防處宣傳嘅「任何仁」早前登場後,喺網絡「爆紅」,但係噚日傳出真人版「任何仁」從此消失,以後只可以卡通人物形式出場,禁止真人再扮,原因包括「有違正面英雄形象」、「意識不太好」等,不少網民都大感失望。「消失」一日後,「任何仁」今日下晝終於「上水」,話會繼續教育大眾,宣傳「應急三識」,令網民大感安心。

消防處下晝喺facebook發帖文「任何仁の日常相」,相中「任何仁」歎住咖啡向大家報平安。「任何仁」仲話呢排做到好攰,啱啱先起身,所以唔知發生乜事。

「任何仁」話會繼續教育大眾,宣傳「應急三識」,仲提提大家「唔好錯重點,應急三識先係焦點」。

「任何仁」又笑言消防處「老細幾玩得」,仲話「呢幾日太忙,想游個水鬆下,但太平洋都被抽乾」。帖文發出約一個鐘,已有近萬讚好,可見大家都非常熱切關心,有網民希望「任何仁」唔好「消失」,留言:「香港人愛你。」

另外,有網民發現「任何仁」身形比早前消瘦,留言「無見你一日,瘦咗」,有人話佢「被人抽水抽到乾晒瘦晒」。

相關新聞:【Emily Online.短片】消防處推官方fb教救人、自救技巧 「任何仁」亂入記者會

 

相關字詞﹕消防處 任何仁 急救 編輯推介

上 / 下一篇新聞