港聞

下一篇
上一篇

【短片:Emily Online】議員港珠澳大橋打卡 陳恒鑌瞓身度路牌長度 (17:17)

港珠澳大橋開通儀式下星期二(23日)喺珠海口岸舉行後,大橋下星期三(21日)就會正式營運。立法會交通事務委員會約20個議員,今朝搭專車去視察香港口岸同香港接線。難得可以「快人一步」上橋,唔少議員都喺大橋上「打卡」,其中民建聯嘅陳恒鑌,見到港珠澳大橋香港連接路呢個「全港最長」嘅路牌,喺黨友葛珮帆「慫恿」下,就喺馬路邊「瞓身」,度下路牌有幾長。

相關報道:【港珠澳大橋.短片+多圖】橋面去水口直通落海 議員質疑港口岸未建多層停車場「咁嘥」

葛珮帆喺facebook直播咗度路牌嘅情況,身為立法會交通事務委員會主席嘅陳恒鑌,起初只係同運輸及房屋局長陳帆,一齊喺路牌隔離影相打卡,點知葛珮帆突然大叫「咦阿Ben(陳恒鑌),我以為你會瞓底度下」個路牌有幾長。陳恒鑌亦非常聽話,即刻喺路牌前面瞓低,用自己嘅身軀當做「永備尺」嚟量度。

路牌上除咗寫住「港珠澳大橋香港連接路」10個中文字,仲有連接路嗰串英文名,令路牌成為「全港最長」。陳恒鑌同Emily講,佢身高1.76米,伸直埋對手就有約2米高。但睇返片,佢瞓喺度舉高埋對手,都仲係爭少少先夠個路牌咁長,換言之個路牌比一般高2米嘅住宅木門更加長。

議員今日亦視察咗港珠澳大橋香港口岸旅檢大樓,其中工程界嘅盧偉國,就講到大樓建築「非常宏偉」。單係大樓個巨型天幕,就由45塊大36塊細共81塊組件合成,組件喺廣東中山預製,之後運到口岸人工島,用咗9個月完成安裝。

相關報道:接駁未盡善 大橋周三通車 直巴料開一半班次 連接路未完工 陳帆預告初期客流低

相關報道:港珠澳大橋高清攝錄車牌 片段有需要或交內地

相關字詞﹕港珠澳大橋 民建聯 陳恒鑌 編輯推介

上 / 下一篇新聞