港聞

下一篇
上一篇

【Emily Online】華仔有冇改撐填海旁白? 黃元山笑住話唔知 讚有勇氣表態 (13:44)

被外界稱為「民間特首」嘅劉德華為團結香港基金推出嘅影片擔任旁白,話東大嶼都會嘅大規模人工島方案喺眾多建議當中,係「比較可取」嘅一項,結果惹嚟網民批評,特首林鄭月娥上個禮拜都為華仔抱不平。團結香港基金副總幹事黃元山今朝喺電台節目被問到呢件事,佢話旁白講稿係由基金撰寫,華仔亦認同內容,至於華仔有無更改當中嘅字眼,佢就話唔知道啦。

黃元山今朝喺商台話,劉德華有睇過團結香港基金嘅研究報告,都支持填海計劃,講稿就係由基金寫嘅,華仔都認同內容。黃元山又話,「過程裏面有佢嘅feedback(回應)同input(意見)」。至於劉德華有冇改過講稿字眼,黃元山就笑住答:「具體我真係不知」。佢又話,自己敬佩劉德華有勇氣表達意見,「明知道唔同人有唔同意見」,「佢無必要去義務講呢番說話」。

同場嘅「反填海達人」、規劃署前助理署長伍華強就畀主持問到,會唔會對華仔支持填海有啲失望,但伍華強就話自己好少上網、好少留意時事,到今日為止都未睇過條片。

相關新聞:

【短片】劉德華為團結香港基金影片旁述 稱「放假迫」因土地短缺

「民間特首」支持填海被人身攻擊 林鄭撐華仔:對佢非常唔公道

相關字詞﹕團結香港基金 黃元山 劉德華 填海 東大嶼 人工島 伍華強 編輯推介

上 / 下一篇新聞