懷孕董敏莉為BB戒口 帶齊「大媽三寶」遊日本

早前宣布懷孕的董敏莉(Monie),日前聯同家人出發日本大阪旅行,當地早前發生地震,令Monie一度考慮取消旅程:「其實每年我都會同家人一齊去旅行,今年就連埋肚入面的BB一齊參與。其實由年頭開始夾家人的時間,點知出發前就有地震,所以都擔心,加上日本熱浪持續,朋友都有勸我轉地方,但係屋企人都準備好酒店同機票,見情況有好轉,所以照常出發。」

董敏莉笑言每天都準備好「大媽三寶」起行:風扇、退熱貼、毛巾出發,而老公沿途呵護備至,令Monie未感到辛苦:「當地日日都三十幾度,大汗淋漓咁去每個景點,加上孕婦體溫比正常人高,我又唔可以食凍嘢,唯有睇住老公食西瓜、雪糕解暑。」

Monie笑言今次日本團「伙食差」,因為她要為腹中BB戒口:「很多東西也不能吃,魚生不用預我,唯有吃多點水果補數。其中一日我們去動物園,我行埋少少同鹿群影相,老公好擔心叫我護肚,因為怕牠們撞到BB,呢份細心真係拍拖時都未見過。」

(即時娛樂)

上 / 下一篇新聞