港聞

下一篇
上一篇

【Emily Online】政府鼓勵各界辦活動 慶國家改革開放40周年 (18:20)

今年係國家推行改革開放40周年。政府發言人公布,政府以「飛躍四十載 同發展‧共繁榮」為慶祝主題,由政務司長張建宗領導督導委員會,統籌同監督重點慶祝活動。而為鼓勵社會各界同地區組織搞活動,政府推出咗個「認可計劃」,獲認可嘅團體,可以喺慶祝活動同宣傳品上,使用由特區政府設計嘅標誌及口號。

有區議員7月收到張建宗信函,鼓勵佢哋搞活動申請成政府認可嘅活動,包括民主黨南區區議員柴文瀚。佢話大家記憶猶新,上年回歸20周年,各區都有好多政府認可嘅慶回歸活動,但好多活動都唔關回歸事,笑言今次都可能出現一啲活動係「改革開放四十年與後巷清潔」,完全係搞咩都得。

佢認為,政府個認可計劃只係蓋個印喺啲活動上面,冇實質意義,自己唔會搞活動申請呢個認可計劃,一來冇時間,二來呢個計劃冇資助。

金融服務界議員張華峰去年喺立法會特別財會上提及,有啲政府認可嘅慶回歸活動,同回歸無關,例如:沙田區清潔三無大廈活動、全港國際氣候跨課程比賽、持續性的長者服務等。民政事務局長劉江華就話,慶祝回歸要讓市民參與,「接地氣」嘅活動都會支持。

另外,政府發言人指,配合「飛躍四十載 同發展‧共繁榮」嘅音樂亦會於稍後公布,政府將舉辦一連串慶祝活動,包括大型研討會、專題展覽,亦會推出專題網站,向市民發布有關活動資訊。

其他報道:【沙中線工程問題】煤氣公司證土瓜灣站4喉管沉降 有接駁位輕微滲漏

其他報道:港鐵學院廣告疑寫錯物理公式 湯博士斥不合理 「磁場無電流難怪成日開不到車」

其他報道:千名港學生浙江交流指佩服內地發展 范徐麗泰籲了解「香港在國家意義」 可到浙江發展

相關字詞﹕改革開放 張建宗

上 / 下一篇新聞