港聞

下一篇
上一篇

【短片:Emily Online】特首扮市民打熱線 林鄭fb鋪片宣傳施政報告諮詢 (14:52)

特首林鄭月娥嘅新一份施政報告,將會喺今年10月發表,諮詢工作今個月開始。林太今日就喺facebook上載咗一段片,入面佢扮市民打去諮詢熱線,同工作人員一唱一和演出,宣傳今次施政報告收集意見嘅各種渠道。佢仲特別提醒大家,去fb同埋Instagram留言講意見,佢都會收到㗎!

其他報道:【圖輯】港人追思劉曉波 稱劉霞獲釋「一定不是人道」

其實近日政府已經就2018施政報告嘅公眾諮詢,推出咗電視廣告,不過廣告入面嘅所有人物,包括林太自己,都係卡通公仔。今日林太喺佢個fb專頁post出嚟嘅短片,就終於見到佢真身。

短片分為左右兩邊畫面,林太喺左邊,熱線工作人員喺右邊。一開始,見到林太打電話去施政報告公眾諮詢熱線,問市民有咩方法喺今年嘅諮詢中表達意見。接電話嘅職員就拎出大大張貓紙,答佢可以透過電話、傳真、電郵、網頁同郵寄表達意見。林太似乎覺得職員答得唔夠完美,追問佢「又話可以去特首個fb留言表達意見嘅?」對方就搵出另一張貓紙同林太講,去特首嘅fb post或者inbox(私訊)專頁,有關方面一樣會收到意見。

講到呢度,林太就遮一遮住電話,對畫外嘅身邊人讚對方「都答得幾好」。佢之後繼續喺電話入面話自己會post有趣嘅嘢去Instagram,叫對方提醒大家,一樣可以去嗰度留言畀意見,對方聽到一臉「黑人問號」,問佢係邊個,林太呢個時候先話自己就係林鄭月娥。林太最後重申,今年市民除咗可以用傳統方法表達對施政報告嘅意見,亦可以去佢嘅fb同IG留言,「為香港,一齊講」,呼籲市民踴躍參與諮詢。

條片上載唔到6個鐘頭,有超過7500人次睇過,400幾個表情符號回應,仲有百幾個留言,相對其他post,反應都算唔錯。至於網民留言講啲咩,係讚係彈,就留番畀大家自己睇啦。

今次真人演出嘅片段,林太就淨係上載咗去fb,IG就只得一張加咗字嘅片段截圖,叫大家想知發生咩事就自己去佢fb睇片喎。

其他報道:解決住屋靠土地供應 陳茂波稱大規模填海無可避免

其他報道:限時辯論受質疑 梁君彥反問「給360小時便會平靜點嗎?」

相關字詞﹕施政報告 林鄭月娥

上 / 下一篇新聞