港聞

下一篇
上一篇

【短片:Emily Online】囚犯聚賭手法高 懲教拍片籲反賭 (21:36)

當大家熱切期待星期日(15日)晚嘅世界盃決賽時,會唔會諗到呢個四年一度嘅體育盛事,可能會喺懲教院所內掀起賭風,危害院所紀律同秩序?唔好以為電影中先至有五花八門嘅賭具,原來喺戒備森嚴嘅監獄,在囚人士為咗可以「賭」,不惜施展渾身解數,喺有限嘅地方運用緊絀嘅資源,製作各式各樣嘅賭具,用盡方法瞞天過海,逃過懲教人員法眼。

懲教署今日喺facebook發表「技術擊『賭』 破解有道」短片,揭露在囚人士為咗賭,到底可以去到幾盡。影片中化身「大內密探」嘅豐Sir,介紹在囚人士喺有限資源下所製作啲賭具,例如經改製後有暗格嘅「古惑拖」,同用火柴做嘅「雀寶」等,完全係物盡其用,真係令人大開眼界。

當中Emily最驚訝嘅係,有在囚人士利用獲派嘅麵包同肥皂嚟搓成骰仔,完全展示到製作人嘅「創意同心機」,呢幾粒骰仔仲幾別緻添。

豐Sir仲話,在囚人士為了掩人耳目,會將賭博資訊以暗號方式收藏喺書內,甚至係喺衣服褶口位。另外佢哋為免人贓並獲,會收埋賭具係不同地方嘅暗格,種種手法層出不窮,懲教人員認真要絞盡腦汁嚟破解。不過所謂「你有張良計,我有過牆梯」,豐Sir話,最重要都係留意佢哋嘅日用品,同掌握對方心理,以便喺突擊搜查時,將佢哋一網打盡。

其他報道:【短片:港鐵主動報告】東鐵線大圍站沉降20毫米 叫停新世界附近工程

其他報道:【短片:Emily Online】尹光化身交通警 改編《少理阿爸》宣傳道路安全

其他報道:休班警涉重複伸腳拍裙底 稱鞋上攝錄機為他人擺放

相關字詞﹕懲教署 監獄 賭具 編輯推介

上 / 下一篇新聞