【短片:Emily Online】暫放下政治爭拗 議員搭膊頭大合唱

立法會舉行午間音樂會,青年音樂訓練基金用中西樂器合奏。部分建制派同泛民議員都有演出,暫時放低平時議事堂嘅爭拗,齊齊搭晒膊頭嚟個大合唱,立法會主席梁君彥、秘書長陳維安都有份。梁君彥唱完歌之後笑言,未試過咁多議員嚟聽音樂會,平時喺立法會議事廳都冇咁多人,之後話鋒一轉,話好認同議員都係為香港人做事,中西樂玩嘅樂器唔同,好似唔啱Key咁,但終歸係可以夾到,希望議員可以放低今年爭拗,下年合作好一啲。

噚日立法會大會否決由泛民提出嘅不信任梁君彥動議,會議廳入面建制、泛民陣營互相批評。不過,今日就和諧得多,經民聯盧偉國、公民黨陳淑莊、新民主同盟范國威同立法會秘書長陳維安合唱《萬水千山縱橫》,醫學界陳沛然、教育界葉建源打鼓伴奏,盧偉國仲主動同范國威握手𠻹。

盧偉國過去幾年,都有參與音樂會嘅樂器演奏,今日佢就用色士風,同青年音樂訓練基金嘅一班學生合奏《江河水》,個樣好投入、好陶醉,不過唱歌嗰陣就入早咗。

立法會前主席曾鈺成同細佬、前民政事務局長曾德成都有出席觀賞音樂會。最後佢哋大合唱Auld Lang Syne《友誼萬歲》。

青年音樂訓練基金主席蕭炯柱話,班學生緊張咗兩星期,佢希望教學生挺起胸膛面對觀眾。而梁君彥就笑言啲議員可能緊張咗兩個月,所以「年輕人做嘢千祈唔好話驚,可能人哋仲驚過你」。

有參與演出嘅學生話,感謝議員特登為今日個音樂會入天水圍同佢哋綵排,佢哋相信議員都係為香港好,想市民開開心心、安居樂業,希望議員唔好忘記初心。

其他報道:【短片:Emily Online】尹光化身交通警 改編《少理阿爸》宣傳道路安全 

其他報道:【網上熱話】校長雨天撐傘門口接學生 網民:學生的福氣

其他報道:陶君行不小心駕駛兩罪成 罰款3500元

上 / 下一篇新聞