【短片:Emily Online】尹光化身交通警 改編《少理阿爸》宣傳道路安全

今日Emily喺警隊Facebook見到有「廟街歌王」之稱嘅尹光,大開金口唱出經典歌曲「少理阿爸」改編版「少理距離就咪出街」,幫警隊宣傳交通安全。警隊小編更留言提提大家「全家Drive~Drive~Drive~冇精神就咪揸車!」

影片中尹光以多個造型登場,當中更穿起交通警員制服,睇起嚟有板有眼,英氣十足!有網民大讚尹光著住件制服幾好睇「真係成個阿sir咁」。條片出街兩個鐘,有近800個LIKES,300多個分享,網民反應都幾正面,不少人留言表示條片「好正」、「尹光好型」。

尹光喺歌詞唱出多個交通安全規則,提醒大家切線前先打燈,避免超速,唔好試非法賽車,以及要安全過馬路等等。Emily覺得最搞笑一幕係尹光扮演的士司機大唱「飲左酒就坐的士,冇飲酒就揸福士」,而身後兩個乘客「浪下浪下」,暈曬大浪,其實提醒各位飲酒後唔好揸車。

其實警隊唔係第一次玩二次創作,之前曾經改編日本洗腦歌Pen-Pineapple-Apple-Pen(PPAP),宣傳上車要緊扣安全帶,不過網民反應兩極。今次出動尹光大玩經典名曲,睇嚟大家都非常受落,首歌都幾洗腦,Emily聽多幾次差啲唔記得原本歌詞係點。

其他報道:失魂漢搭的士遺15萬現金 報警求助

其他報道:大致多雲 驟雨雷暴 最高30度

其他報道:鑽研網絡安全 尋「能人所不能」樂趣 兩黑客賽稱冠 中大生盼做白帽黑客

上 / 下一篇新聞