【Emily Online】殘奧日試玩硬地滾球 林鄭劉江華組隊贏劉德華

亞洲殘疾人運動會今年10月將喺印尼舉行。為喚起公眾關注殘疾人運動,香港殘疾人奧委會暨傷殘人士體育協會(協會)今日喺沙田香港體育學院舉辦「香港殘奧日」,畀市民試玩18項殘疾人運動。特首林鄭月娥獲邀主禮,同林大輝以及劉江華組成三人隊落場試玩硬地滾球,擊敗明星劉德華同殘疾運動員等組成嘅三人隊,贏得一片掌聲。

協會由2016年起每兩年舉辦「香港殘奧日」,今年吸引逾1000名市民事先登記參加,除咗硬地滾球,試玩運動亦包括輪椅劍擊同賽艇等。林太今日出場時引嚟唔少掌聲,外號「民間特首」嘅劉德華就似乎有更多粉絲,出場時掌聲更大,有人高叫「華仔」表示支持。

林太致辭時話,政府為支援殘疾人士參與體育活動,近年增加投放資源,支持殘疾人士體育發展,今個財政年度嘅預算開支達7000萬元,較上年度增逾半,當中包括支持殘疾運動員備戰同參與大型運動會,並為佢哋舉辦本地大型體育活動。

林太形容自己同殘疾人士淵源極為深厚,始於18年前擔任社署署長時。當時署方盡力支持傷殘人士運動,包括成立「展能精英運動員基金」,而佢離開社署時出版咗本《署長隨筆》,40多篇文章中第一篇,就係「為殘疾運動員喝采」。

林太話,見到傷殘人士喺參與體育競技時嗰種拼搏同堅毅不屈精神,佢寄語大家唔好喺日常工作中面對挑戰就輕言放棄,自己亦向每一位傷殘運動員致敬。

其他報道:調查指八成家長贊成禁新興煙產品 最年輕11歲食電子煙

其他報道:傳真社:按契諾領展須分擔23居屋公地維修費 有屋苑業主不知情 多付千萬元

其他報道:調查指劏房戶被濫收水電費 有住戶被收多逾倍水費

上 / 下一篇新聞