經濟

下一篇
上一篇

【有片:富貴長者宿】豪華護老院月租4萬 (14:57)

松齡護老集團(1989)最新推咗兩個高端護老院項目,其中一個係位於元朗YOHO MALL附近嘅松齡雅苑,噚日集團帶一班記者參觀,仲話對高端護老市場有信心,覺得院舍可以好快「爆滿」。

松齡雅苑裝修費用咗4000萬元,樓面面積達3.3萬呎,可以容納到68個安老宿位,集團行政總裁嚴沛基話上星期先開始推廣,已經有幾名長者入住。話到明係高端護老院,入面設施都講求貼心,有迷你影院、髮型屋、圖書館、室內花園、麻將房、按摩間等。每個老人家仲有個「全天候管家」跟身照顧起居飲食、安排興趣活動,只要係合理範圍內嘅要求都可以「有求必應」,譬如「老人家想買生日禮物畀孫女,管家都可以幫佢做到」。

如果唔係有需要入住高度護理嘅房間,老人家都可以一人一間房,不過張牀就唔係咁大啦,每張牀位嘅每月住宿費平均大約4萬元,包一日三餐兼下午茶,早餐仲係自助形式,亦都包埋每星期有一次專科醫生看診,同兩次嘅物理治療師服務。

記者:劉旭霞

相關字詞﹕財經網-即時財經 編輯推介

上 / 下一篇新聞