【短片:Emily Online@世界盃】天文台「出貓」講時區冷知識 ETV式提你睇波留意時差

今屆世界盃仲有唔夠一星期就舉行,天文台將今個星期嗰集《氣象冷知識》,「出貓」變成「時區冷知識」,用大家細細個就睇嘅教育電視(ETV)形式,講解點樣劃分時區,仲提提大家舉辦世界盃賽事嘅城市,同香港有3至6個鐘時差,波友們睇波時,要記得睇清楚時間喇!

其他報道:作家劉以鬯逝世 享年99歲

片段一開始,等睇球賽嘅「小喵子」就攤喺梳化大叫,問幾時先開波。佢老友「Tiger」就話佢知,俄羅斯時區同香港唔同,所以未咁快開波。呢個時候,天文台科學主任李鳳瑩就出嚟講,地球同足球一樣「都係圓嘅」,同埋地球會自轉,令世界各地日頭同夜晚出現嘅時間都唔同,造成時差。為免混亂,各地就逐漸發展出時區。

「香港天文台教育電視」話畀大家知,全球分為24個時區,每個相隔15經度。香港時區較0時區快8個鐘。2018世界盃嘅賽事,就主要喺主辦國俄羅斯首都莫斯科,同另外10個城市舉行,呢啲城市同香港,都有3至6個鐘頭時差。

天文台仲提提大家,俄羅斯嘅國土面積係全世界最大,橫跨11個時區,亦係全世界最多,佢嘅西伯利亞鐵路長度冠絕全球,如果大家去當地就要留意返,你手表上嘅出發地時間,可能同火車表同埋車站月台嘅時間完全唔同,所以要記得睇清楚呀。

今次天文台嘅「時區冷知識」上載facebook後,吸引唔少網民留言。大家除咗畀幾隻貓演員吸引住,仲有人留意到節目有幾幕,似足大家回憶中嘅教育電視,仲特登用到以前電視嘅4比3制式拍攝。另外有網民問,俄羅斯而家究竟仲有無夏令時間?天文台就回覆,俄方幾年前已經取消咗有關安排,全年回復冬令時間,連時區數目都調整過。

其他報道:小狗雨中登巴士被趕 網民自發幫忙大團圓結局

其他報道:紅磡站問題 運房局去年已知 分判商通報 問港鐵無結果 路政署無再跟進

上 / 下一篇新聞