港聞

下一篇
上一篇

【短片:Emily Online】警隊fb貼山頂凌霄閣反恐演習片 網民留言指似TVB劇 (22:15)

近年世界各地不時發生恐怖襲擊,保安局長李家超上個月講過,未有具體情報顯示香港會受到恐襲,但都要加強反恐準備和能力,6個紀律部隊上個月仲成立跨部門反恐專責組。香港警察星期四(16日)就喺facebook上載一條片,話係早前喺山頂進行反恐演習嘅情況。有網民睇完片就留言,話條片好似無綫電視(TVB)最近播放嘅劇集咁呀。

警方fb條片長近2分半鐘,呢場代號「鎮雷」(RIDESTORM)嘅反恐演練,由凌霄閣保安發現有可疑人物後報警開始。最先到場嘅幾個軍裝警,首先拘捕一個插咗把刀喺褲後袋嘅疑犯。衝鋒隊同反恐特勤隊趕到之後,就封鎖現場同開始部署,陸續喺凌霄閣唔同位置搜索,其間仲有一班「市民」一路大嗌「有槍呀」,一路由商場跑出嚟。警方最後開槍打中持槍恐怖份子,又趁畀疑犯持刀挾持嘅人質掙脫跑開時,射低埋嗰個疑犯拘捕咗佢。

有網民睇完片留言,話條片「好好睇」,又有人問可唔可以透過警民關係組,申請「做人質」參加演習,仲有一位網民話覺得片段好似TVB最近播緊、有關飛虎隊嘅劇集咁。警方就話會繼續努力,確保一旦有突發事件發生,可以迅速、有能力處理,「切實保障香港市民生命財產安全」。

其他報道:安達邨獨行劫匪犯案一日後被捕

其他報道:【石棺藏屍案】主審法官健康問題 解散陪審團

相關字詞﹕警察 反恐 恐襲 恐怖份子 恐怖襲擊 保安局 山頂 凌霄閣 飛虎

上 / 下一篇新聞