國泰3名空中服務員早前喺航班上嘲諷乘客英語用字錯誤，事件引發軒然大波。行會召集人葉劉淑儀同黨友喺剛過去嘅佛誕長周末到浙江考察，同內地官員之間嘅話題都離不開國泰風波。葉太話，當中有人表示憤慨，問點解今時今日香港人仲歧視內地人；但亦有唔少人話，內地部分網民反應過激，例如質疑點解香港人唔係全部講普通話，又要求英資太古集團撤出國泰等。葉太又話，有內地官員同佢講唔好排除外資，「什麼資金都歡迎，大家一同拚經濟才有發展。」
葉太提到，可能內地部分網民唔了解香港社會獨特性質，「現今香港講普通話的人雖然愈來愈多，但事實並未如內地般普及」。
風波發生後，有內地網民話國泰飛內地航班嘅空中服務員對每個乘客都用普通話詢問要唔要毛毯，不過葉太就「反潮流」，透露自己準備出新書《Learning English from Regina》，佢話，近年與唔少青年人交流，發覺唔少大學畢業生英語文水平下降咗，「假如香港人嘲笑個別人士英文發音或文法有誤，那麼他們有沒有反省自身英語水平？」