香港紅十字會輸血服務中心早排血庫存量「告急」，呼籲市民踴躍捐血，雖然紅十字會近日話，捐血數字已回升，但做好事點會嫌多？最近各區民政處同「三會」（撲滅罪行委員會、防火委員會同分區委員會）雖然忙於喺地區講解政府嘅地區治理方案，又去內地不同城市考察，仲要積極參與社區活動㗎，其中觀塘民政處今日（25日）就聯同當區區議員同「三會」正副主席參與捐血活動，同時鼓勵社區人士響應，當然唔少得觀塘民政專員林兆康同觀塘區議會主席柯創盛一齊出席。
與此同時，民政及青年事務局今日喺社交平台介紹「三會」嘅委員，以「三會委員幫到你」為題拍片分享服務地區嘅經驗，佢哋分別係擔任九龍城區啟德分區委員會委員嘅前三項鐵人運動員陳樂怡，擔任灣仔區撲滅罪行委員會委員、從事地產租務同投資嘅湯振傑，同埋擔任九龍城區撲滅罪行委員會委員嘅社工余秀珠，其中湯振傑同余秀珠都喺其他地區有服務經驗，3個人仲一齊話「建設社區幫到你」！