第51屆香港藝術節噚晚（18日）閉幕，由奪得2022年國際古典音樂大獎（ICMA）年度交響樂大獎嘅德國班貝格交響樂團進行閉幕演出，樂團嘅演出以德伏扎克家喻戶曉嘅「新世界交響曲」打頭炮，之後以二十世紀先鋒派作曲家利蓋蒂嘅作品「給一百台拍子機的《交響詩》」作間奏，最後作結為布拉姆斯晚年創作嘅「第四交響曲」。
演出後嘅閉幕祝酒儀式喺香港文化中心舉行，有份主禮嘅政務司司長陳國基噚晚喺微博分享感受，話呢個藝壇盛事向世界各地觀眾，展現香港東西薈萃、古今交融嘅獨有魅力，又話其他文化藝術領域嘅盛事將會一浪接一浪咁喺香港舉行，邀請各地遊客嚟體驗「亞洲盛事之都」嘅無限活力。佢又話，今屆藝術節順利圓滿地以實體方式舉行，係香港全面復常嘅又一實證。
閉幕演出連續第11年由工銀亞洲獨家贊助，工銀亞洲候任董事長劉亞干話，全力支持香港建設「中外文化藝術交流中心」，成為世界級文化樞紐。今屆藝術節有超過1,700名國際及本地藝術家，獻上共111場演出，當中包括9個世界首演作品、6個亞洲首演作品，又舉辦超過300項「加料節目」同藝術教育活動。