特首李家超噚日（23日）去咗廣州、深圳訪問，話咁快，就收到喺廣州讀書嘅香港小朋友來信，祝「家超伯伯」訪問廣州順利，仲邀請佢去學校參觀，李家超都祝佢哋學業進步、健康快樂。睇返幾封信嘅內容，都分別介紹學校嘅環境同活動，例如喺元宵節包湯圓、中秋節整月餅等。
李家超話，呢啲小朋友就讀嘅廣州市越秀區朝天小學，正係內地第一間開設「港澳子弟班」嘅公立小學，可以話係見證兩地教育合作交流嘅階段性成果。
李家超又話，《粵港澳大灣區發展規劃綱要》頒布4周年，其中綱要提出，要加強基礎教育交流合作，鼓勵粵港澳三地中小學校結為「姊妹學校」，喺廣東建設港澳子弟學校或設立港澳兒童班，而政府正積極努力向目標進發，推動多方合作交流項目。