醫療輔助隊今日（29日）喺社交平台facebook介紹吉祥物「有心熊」，總參事黃英強希望藉「有心熊」向大眾推廣醫療輔助隊工作，並吸引更多志同道合嘅人加入部隊。翻查資料，保安局喺今年9月舉行名為「同心．展新」嘅步操大匯演，當時紀律部隊各自為代表自己部隊嘅熊仔著上制服，而「有心熊」同樣喺當日亮相。
根據醫療輔助隊嘅專頁介紹，呢隻「有心熊」身穿醫療輔助隊嘅制服，解釋「有心熊」同部隊嘅「有心人」，即經受訓嘅志願隊員一樣為市民提供服務；至於英文名「AMSER」喺威爾士語指時間，亦可寫成醫療輔助隊縮寫「AMS-er」，代表隊員每日利用空餘時間，爭分奪秒去幫助有需要嘅人。
黃英強又透露，今個星期六（3日）將會係油塘舉辦「醫療輔助樂繽紛」嘅活動，除咗設有急救裝備及車輛展覽，及有獎遊戲外，同時有「神秘嘉賓」出場進行急救示範，仲會同參與嘅市民「打卡」留念。
相關字詞﹕醫療輔助隊