為慶祝國家成立73周年，近期政黨都紛紛舉辦慶祝活動。民建聯觀塘支部噚日就喺啟業商場天台運動場舉辦「賀國慶男子3人籃球賽」，希望藉住國慶活動，令青少年對國家有更多認識。民建聯觀塘支部嘅議員幹事都有組隊參加友誼賽，仲邀請埋經民聯青委會、新民黨青委會、工聯會觀塘地區服務處及青年民建聯參加。
民建聯觀塘支部主席兼觀塘區議會主席柯創盛話，今次「國慶杯」有雙重意義，運動既可以培育青年正向發展，亦可藉住國慶增強民族自豪感。賽事邀請少數族裔隊伍及懲教所義工團參加。
另邊廂，選委會界別立法會議員梁美芬噚日亦同工程師、藝術家同油尖旺區民政事務處，喺尖沙嘴緬甸臺信號山花園外山坡合辦畫壁畫運動，高5米闊20米嘅壁畫有維港景色、尖沙嘴鐘樓，仲寫上「國慶喜洋洋」等字句。參與者包括中小學生及當區少數族裔朋友。梁美芬呼籲大家有時間去「打卡」，話希望將正能量「灌注每一區」，「說好香港故事」。