中秋節將至，唔少人都關注下星期二(農曆八月十八日)舉行嘅六合彩中秋金多寶攪珠，因為10元一注中頭獎可以捧走8000萬元；但原來上年度無人認領六合彩彩金亦止跌回升，由前年1900萬元回升至3000萬元，升幅約58%，主要係期間投注站恢復服務，攪珠次數比前一年多，令唔記得去投注站領取派彩嘅「失魂魚」明顯多咗，而呢筆錢會撥入金多寶彩池，成為金多寶攪珠嘅彩金。
講開六合彩「失魂魚」，原來都同中秋金多寶有關，主要係歷來最高無人領取六合彩獎金，正正係1998年嘅3800萬元中秋金多寶頭獎。當年呢個「失魂魚」仲搞出「大頭佛」，因為嗰期頭獎一直無人登記中獎，點知一經傳媒報道後，竟然有百幾人走去馬會總部登記，話自己就係頭獎得主，不過最離譜係無人答得到買到嗰張頭獎彩票嘅正確投注站名稱。
相關字詞﹕六合彩；賽馬會