即時港聞

Emily Online|自詡比李家超靚仔及學歷高 傅昌權抱怨取不到提名 (23:28)

特首選舉周四最後一個工作天報名,前政務司長李家超今日(13日)持786提名票報名,但其他早表明有意參選的人就無消息。其中一名報稱係「自由傳道人」嘅傅昌權,今晚好緊張咁拜訪傳媒機構,話要公開呼籲全港關注,話特首選舉點可以只有一個「入閘」參選,話自己學歷高,有博士學位,學歷比李高,又做過唔同工作,唔係只識保安範疇,仲話自己外形比李家超優勝, 「好多人話古天樂好似我」,抱怨點解咁唔公平,攞唔到提名票入閘參選。

傅昌權話,特首選舉如果只有一人參選,會成為國際笑話,佢希望盡最後努力爭取選委提名,咁就可以同李家超同台辯論。佢又話李家超政綱都未出,點解會有700幾個選委提名佢,認為咁樣做法係「擦鞋」喎。佢話如果自己參選,會提出方法修補社會撕裂。

之前都有幾人公開表態話想參選,包括民建聯前成員胡世全和網絡紅人冼國林,仲有賴紅梅、李稚嘉、蕭德良、建制組織「珍惜群組」召集人李璧而等。冼國林在報名截止前無特別動靜,今晚在社交媒體播片,內容係用英文朗讀中英聯合聲明。

 

 

上 / 下一篇新聞