獲准保釋嘅民主派「35+」初選案被告、立法會前議員陳志全（慢必）近日傳來好消息，慢必噚日同其同性伴侶Francis拉埋天窗。香港唔承認同性婚姻，Emily問過出席儀式嘅人民力量前主席袁彌明（Erica），佢話慢必同伴侶嘅婚禮喺一間酒店舉行，搵咗美國一個承認同性婚姻嘅州份，由當地律師遙距視像證婚，過程嚴謹，歷時約20分鐘，而慢必因為有案在身，旅遊證件在法庭，Erica話慢必有同美國當地傾，對方都接受用副本。
Erica話，儀式過程都感動，佢第一次出席同性結婚嘅婚禮，話同慢必咁老友，但都係第一次見佢同Francis咁親密，感覺好特別。佢恭喜對方有情人終成眷屬、係亂世中有愛，滿滿幸福嘅滋味，話原本應該有更多座上賓客可以一同分享喜悅，但因為失去自由無法參加，例如快必譚得志。
據Emily所知，慢必同Francis一齊咗近3年，Erica透露，慢必被還押嘅約200日中，Francis幾乎每日去探望，仲為對方處理家頭細務，仲驚自己處理得唔夠好，還押期間體現到佢好愛慢必。