即時港聞

Emily Online|《東張西望》黃穎君離TVB 轉跑道入政府月薪近7萬 (18:17)

無綫電視《東張西望》早前播出富亨邨「曱甴屋」故事,女主持黃穎君勇闖「曱甴屋」獲網民好評,但原來黃穎君已離開TVB,轉職民政事務局做合約制媒體主任。黃穎君同Emily講述「轉跑道」原因,話喺TVB工作9年,早排有朋友見到招聘廣告,話條件適合佢,家人、朋友都支持佢去試下,佢又成功獲聘,所以想「轉跑道」,仲話呢份工雖然只有一年合約,但希望未來仍能留低,想未來10年發展新事業。

民政事務局話因應工作需要,獲得公務員事務局批准,增設一個按非公務員合約聘用條款嘅媒體主任職位。媒體主任職位月薪67,295元,於2021年8月13日進行公開招聘。經過甄選程序,黃穎君喺12月7日正式獲聘用為媒體主任,合約為期一年。

黃穎君話,自己喺港大修讀教育課程,然後再修讀中大社會學碩士,學歷其實同演藝圈無關,但佢2012年選港姐入行,至近年做《東張西望》節目,先覺得自己建立經驗,工作先算得心應手。佢話去政府面試時見到有其他應徵者,本來佢都唔係好大信心,因為雖然學歷符合要求,但未曾喺政府等機構工作過。

黃穎君離開電視台,但觀眾未來可以喺民政局宣傳片中見到佢,因為佢個職位包括幫手拍片,而佢真身上鏡必然唔少得。 

相關字詞﹕東張西望 黃穎君 曱甴屋 民政事務局 編輯推介

上 / 下一篇新聞