建制派KOL「華記」楊官華同珍惜群組李璧而，近日積極幫元朗7．21襲擊案中被判囚7年嘅被告鄧懷琛「平反」，兩人原定今日（16日）中午到終審法院遞交聯署，投訴主審法官葉佐文，不過華記今日發聲明，話要同李璧而「割席」，因為佢聽咗資深大律師湯家驊嘅專業意見，覺得現階段投訴法官嘅做法可能藐視法庭，係「好心做壞事」、「靠害」。
李璧而中午繼續到終審法院交投訴，話收集到10.4萬個聯署，有司法機構職員代為接信。李壁而話華記「好細路仔」，成年人如果意見不同唔會咁做，認為華記入世未深「一時間發細路仔脾氣」，佢自己冇介懷，相信華記「經歷多啲事會成熟啲」。