特首林鄭月娥今日（2日）下午率領多名官員見記者，公布最新防疫措施，除咗林鄭月娥除口罩發言之外，其餘出席記者會嘅官員都一直戴住口罩。其中食物及衛生局長陳肇始嘅口罩特別搶眼，遠睇好似有啲綠色花紋，Emily細心睇先至發現，原來口罩係印住「少鹽少糖」標誌，藉機提醒市民飲食時要留意減鹽減糖，減低患高血壓、中風、超重和蛀牙等疾病嘅風險。
睇返食物安全中心嘅「全城減鹽減糖」facebook專頁，原來清潔龍阿德都曾經戴過同款口罩㗎。
至於今日出席防疫措施記者會嘅其餘官員當中，勞工及福利局長羅致光戴上銅芯抗疫口罩，公務員事務局長聶德權同埋教育局長楊潤雄就戴上純色口罩。林鄭月娥進場時亦係戴純色口罩，但離場時就無戴返口罩，只係將口罩拎喺手中就起身離開。