香港人嘅童年回憶、海洋公園3個極具標誌性嘅機動遊戲：「極速之旅」、「滑浪飛船」同埋「越礦飛車」今年8月31日之後便退役，要同香港人講byebye。
隨住海洋公園有重生方案，遲啲山上園區會按景點收費，公園今年初已經透露過，山上部分舊機動遊戲要「退休」。海洋公園今日（6日）宣布，呢3個海洋公園重點機動遊戲即將功成身退。「極速之旅」跳樓機目前如常開放；喺急流天地園區嘅「越礦飛車」同埋「滑浪飛船」，就會喺今個星期六（10日）起重新開放，如果大家想把握最後機會回味一番，就要記得喺今年8月31日或之前把握最後機會喇。
唔講唔知，原來「極速之旅」及「越礦飛車」已經投入服務長達20年；「滑浪飛船」自1984年投入服務，更加已經運作37年，係海洋公園其中一個最歷史悠久嘅機動遊戲。呢3個機動遊戲可以話伴隨住Emily同無數香港人一齊成長。