中學文憑試（DSE）4月23日開考，考生難免緊張。100名校長為咗幫新型冠狀病毒疫情下應考嘅DSE考生打氣，同舞台劇製作人陳恩碩合作，一齊亮相幕前拍攝迷你音樂劇電影《我有個夢》。有參與嘅校長話，疫情對今屆DSE考生嘅學習同心理都係大挑戰，希望考生無論考成點，都繼續為夢想努力。
喺《我有個夢》入面，有校長諗番自己細個嗰陣想做音樂人，有校長就想做球員，可惜最終因為現實未能達成夢想。不過咁唔代表校長放棄追求夢想喎，佢哋就算做咗校長，都想作吓歌、搞吓足球比賽，一圓當初嘅夢。
今次製作嘅召集人、福建中學附屬學校校長徐區懿華話，今屆DSE考生喺中五同中六呢兩個關鍵學習年份都撞正疫情，令佢哋學習同心理都有重大挑戰。徐校長鼓勵考生，無論DSE成績如何，都可以繼續為夢想奮發，「只要朝着夢想進發，佢能帶你到一個意想不到嘅地方」。有興趣睇呢套音樂劇電影嘅話，可以瀏覽：youtu.be/Avg1TkQo8Gk